Şəriət qaydalarına əməl edən aviasiya şirkəti bağlandı
Malayziya Mülki Aviasiya Departamenti şəriət qaydalarına uyğun reyslər həyata keçirən “Rayani Air” şirkətinin fəaliyyətini dayandırıb.
Novator.az xəbər verir ki, departament “Rayani Air”in fəaliyyətini 2016-cı ilin aprelində araşdırmağa başlayıb. Araşdırma reyslərin gecikməsi və ya ləğv olunması ilə bağlı şikayətlərə əsasən aparılıb.
İdarəetmə və Təhlükəsizlik Auditinin apardığı araşdırmadan sonra Mülki Aviasiya Departamenti şirkətin daşıma sertifikatını ləğv edib. Departament vurğulayıb ki, bu, ölkə hakimiyyətinin qəbul etdiyi bir qərarıdır. Hakimiyyət hesab edir ki, aviasiya sahəsində nizam-intizam və təhlükəsizliyin olması daha önəmlidir.
“Rayani Air” şəriət qaydalarına tam uyğun şəkildə ilk reysini 2015-ci ilin dekabrında həyata keçirib. Qaydalara görə, təyyarənin göyərtəsində tərkibində spirt, donuz əti olmayan qidalar verilir. Müsəlman stüardessalar başını örtür, qeyri-müsəlmanlar da “abırlı geyinir”. Bundan başqa, uçuşdan qabaq təyyarənin göyərtəsində ibadət edilir.
Malayziya islam ölkəsidir. 28 milyon əhalisi olan çoxmillətli ölkənin 60%-i müsəlmandır.
