“Uzun müddət boynumuza qoyublar ki, müxtəlif dillərə hörmət etmək lazımdır”
“Bizim uzun müddət boynumuza qoyublar ki, xalqın birliyi üçün çoxmillətli cəmiyyətdə müxtəlif dillərə və mədəniyyətlərə hörmət etmək lazımdır. Amma dünya belə siyasətin bir çox ölkədə, o cümlədən Avropada nəyə gətirib çıxardığını görür. Qırğızıstan isə öz konsepsiyasından çıxış edərək bildirir ki, ilk növbədə öz ölkənə, onun tarixinə, mədəniyyətinə, dövlət dilinə hörmət və vətən sevgisi lazımdır”. Novator.az xəbər verir ki, bu sözləri Qırğızıstan prezidenti Almazbek Atambayev deyib.
O vurğulayıb ki, xalqın birliyini möhkəmlətmək üçün əsas məsələlərdən biri dövlət dilini inkişaf etdirməkdir. Qırğız dilinin inkişafı üçün yüz milyonlarla som məbləğində vəsait ayrıldığını qeyd edən prezident bildirib ki, nəticədə milliyyətindən asılı olmayaraq ölkənin daha çox vətəndaşı dövlət dilini öyrənməyə, qırğızca danışmağa başlayıb.
Almazbek Atambayev bu fikirləri 2010-cu ildə ölkənin cənubunda özbəklərlə qırğızlar arasında baş vermiş toqquşmanın ildönümündə səsləndirib. O qeyd edib ki, ölkədə millətlərarası sülhün möhkəmlənməsi üçün başlıca iş vətəndaş şəxsiyyətinin formalaşdırılmasıdır.
2010-cu ildə Qırğızıstanda kütləvi iğtişaşlar baş verib, nəticədə Kurmanbek Bakiyev hakimiyyəti devrilib. Sabitliyin pozulması ölkənin cənubunda özbəklərlə qırğızlar arasında toqquşmalara da gətirib çıxarıb. Üç gün davam edən qarşıdurmada Oş və Cəlalabad vilayətlərində 500 nəfərədək adam həlak olub, minlərlə adam yaralanıb, yarım milyon adam ev-eşiyini tərk edib.
