Nazarbayev xalqa müraciət etdi: “Ölkədə “rəngli inqilab”ların əlaməti var”
Qazaxıstan prezidenti Nursultan Nazarbayev xalqa müraciət edib. Novator.az xəbər verir ki, iyunun 8-də prezidentin mətbuat xidmətinin saytında yerləşdirilmiş müraciətdə Nazarbayev ölkədə “rəngli inqilab”ların əlamətlərinin olduğunu bildirib: “Hamımız bilirik ki, “rəngli inqilab”ların müxtəlif metodları var və onlar süni mitinqlərdən, qətllərdən, hakimiyyəti ələ keçirmək cəhdlərindən başlanır. Bu əlamətlər bizdə də özünü göstərdi. Bəziləri dövlət siyasətinin və qanunlarımızın liberallığından sui-istifadə edib hakimiyyətin möhkəmliyini yoxlamaq istədilər”.
İyunun 5-də Qazaxıstanın Aktobe şəhərində qanlı hadisələr baş verib. Bir qrup dini radikal iki silah mağazasına və hərbi hissəyə hücum edib. Hücum nəticəsində 6 nəfər həlak olub. Onlardan 3-ü polis əməkdaşı, 3-ü isə mülki şəxsdir.
Xalqa müraciətində Nursultan Nazarbayev ekstremistlərin və terrorçuların məhv edilməsi üçün hakimiyyətin ən sərt tədbirlərə əl atacağını vurğulayıb: “Aktobedə hücumları həyata keçirən cinayətkarlar göstərişi xaricdən alıblar. Əldə etdiyimiz məlumata görə, terror aktını radikal, saxta dini cərəyanların tərəfdarları təşkil edib və onlar xaricdən təlimatlandırılıblar”.
İyunun 9-u Qazaxıstanda matəm günü elan olunub.
