Afrikada “su əsarəti”
Afrikada 17 milyondan çox qadın və qız uşağı öz ailəsinə və ev təsərrüfatına su gətirmək üçün onlarla kilometr məsafə qət etmək məcburiyyətində qalır. “PLoSOne” jurnalında bir qrup alimin dərc etdiyi məqalədə belə deyilir.
Novator.az-ın məlumatına görə, məqalə müəlliflərindən biri – ABŞ-ın Corc Vaşinqton Universitetinin tədqiqatçısı Cey Qrem bildirib ki, həmkarları ilə birlikdə Afrikada su daşımaq işi ilə niyə məhz zərif cinsin məşğul olduğunu araşdırmağa çalışıb. Alimlər belə qənaətə gəliblər ki, Afrika ölkələrinin çoxunda su daşımaq aşağı səviyyəli iş sayılır, ona görə də bunu qadınların, qız uşaqlarının üstünə yıxırlar.
Alimlər yazırlar ki, su tapmaq və daşımaq işi ilə yalnız qadınların, qızların məşğul olması Afrika qitəsinin cənub hissəsinin sakinləri üçün daha çox xarakterikdir. Məqalədə qeyd olunur ki, uzaq məsafədən su daşımaq qadınların və qızların sağlamlığına mənfi təsir göstərir, onların artrit, bel nahiyəsində xroniki ağrılar və digər sümük xəstəliklərinə tutulması ehtimalını artırır.
Qrem və həmkarları inanırlar ki, onların tədqiqatı Afrika ölkələrinin hakimiyyətlərinə, BMT-yə və digər beynəlxalq təşkilatlara bu qitənin qadınlarını, qızlarını “su əsarəti”ndən qurtarmaq üçün plan hazırlamağa təşviq edəcək.
