Moskva təcridxanalarında saxlanan şəxslərin yalnız 15 faizi moskvalıdır
Rusiya paytaxtı Moskvada yerləşən istintaq təcridxanalarında saxlanan şəxslərin yalnız 15%-i moskvalıdır. Moskva prokurorunun müavini Boris Markov iyunun 1-də belə açıqlama verib.
Novator.az-ın məlumatına görə, Boris Markov bildirib ki, hazırda Moskva təcridxanalarında saxlanan şəxslərin (məhkumların və istintaqı aparılanların) 39%-i xarici ölkə vətəndaşı, 15%-i moskvalı, qalanı Rusiya regionlarının sakinləridir.
Cəzaların İcrası Federal Xidməti Baş İdarəsinin Moskva üzrə rəis əvəzi Maksim Zalesov isə deyib ki, paytaxtın istintaq təcridxanalarında 8657 adamı saxlamaq üçün yer var. Amma hazırda bu təcridxanalarda 11640 nəfər saxlanır. Zalesov yer problemini həll etmək üçün təcridxanalarda yeni korpusların tikilməkdə olduğunu vurğulayıb.
