Elçin Həsənov 1 il islah işlərinə məhkum edildi
İyunun 1-də Nizami Rayon Məhkəməsində jurnalist və ictimai fəal Elçin Həsənova hökm oxunub.
Məhkəmə soyuq silahla törədilən xuliqanlıq ittihamını daha yüngül maddəyə tövsif edərək, aylıq maaşının 20 faizi tutulmaqla Elçin Həsənovu 1 il islah işlərinə məhkum edib.
Mayın 13-də prokuror ona 3 il 6 ay həbs cəzası istəmişdi.
E.Həsənov ötən il keçmiş “Asiya” agentliyinin başçısı Cəfər Cəfərovun ona basqı göstərməsi ilə bağlı şikayət edib. Sonradan bu şikayət onun özünə qarşı çevrilib. Cəfər Cəfərov da indi dələduzluqda ittiham edilir.
Bu ilin martında E.Həsənova qarşı 221-1 maddə ilə cinayət işi açılıb. Daha sonra bu ittiham daha ağır maddə olan 221-3 maddəsi (soyuq silah tətbiq etməklə xuliqanlıq törətmək) ilə əvəzlənib.
E.Həsənovun vəkili Fariz Namazlı “Tutan” agentliyinə deyib ki, müdafiə tərəfi hökmlə razı deyil, şikayət verməyə hazırlaşırlar. Vəkilin bildirməsinə görə, ittihamın heç bir hüquqi əsası yoxdur və müdafiə tərəfi tam bəraət almaq niyyətindədir.
F.Namazlı düşünür ki, istintaq qərəzli olub. Vəkil buna nümunə kimi xuliqanlıqla bağlı işi Baş Mütəşəkkil Cinayətkarlıqla Mübarizə İdarəsinin aparmasını göstərib. Bundan əlavə, o deyib ki, insidentin şahidləri yoxdur. Bütün ittiham zərərçəkənin ifadəsi üstündə qurulub: “Bu zaman məhkəmənin gedişində E.Həsənovun soyuq silahdan istifadə etməsi mülahizəsi inkişaf etdirildi. Bunu nə zərərçəkənin özü, nə də məhkəmə-tibb ekspertizası təsdiqləyir. Bu hal soyuq silahdan istifadə ittihamını daha yüngül maddəyə tövsif etməyə səbəb olub”.
E.Həsənovun indi üzləşdiyi 221.1-ci maddə amnistiyaya düşür. Amma vəkilin izahına görə, məhkəmə qərarı 20 gündən, yəni amnistiya aktı icraya başladıqdan sonra qüvvəyə minəcəyindən, bu, E.Həsənova şamil edilməyəcək.
E.Həsənov Sumqayıtda nəşr edilən “Yüksəliş naminə” qəzetinin redaktor müavinidir. Bundan əlavə, AXCP Ali Məclisinin üzvüdür.
