İnternetdə nifrət aşılanmasına qarşı yeni saziş
Mayın 31-də Avropa Komissiyası və Facebook, Twitter, YouTube, Microsoft şirkətləri saziş imzalayıblar. Novator.az xəbər verir ki, saziş tərəflərin üzərinə internetdə nifrət aşılanmasına qarşı mübarizə aparmaq öhdəliyi qoyur.
Avropa Birliyi hesab edir ki, yeni qaydalar resurs administratorlarına internetdə istifadəçilərin yerləşdirdiyi aqressiv rəyləri ətraflı analiz etməyə imkan verəcək. İnformasiyanın düşmənçilik aşıladığı təsdiqlənərsə, internet şirkətləri həmin materialı ya siləcək, ya da 24 saat ərzində onu yerləşdirmiş istifadəçinin hesabını donduracaq.
Avropa Komissiyası və internet şirkətləri bəyan edirlər ki, şəbəkələrdə aqressiya doğuran materialların yayılması təkcə bu və ya digər sosial qruplara, ayrı-ayrı şəxslərə deyil, azadlıq və tolerantlıq tərəfdarlarına və açıq cəmiyyətdə ayrı-seçkiliyə qarşı mübarizə aparanlara da mənfi təsir göstərir.
