Səfir: “Rusiyanın Qarabağ münaqişəsini 15-20 dəqiqəyə həll edə biləcəyini deyənlər yanılırlar”
“Dağlıq Qarabağ münaqişəsini Azərbaycan və Ermənistanın özü həll etməlidirlər. Rusiyanın münaqişəni 15 və ya 20 dəqiqə ərzində həll edə biləcəyini deyənlər yanılırlar”. Trend-in məlumatına görə, bunu Rusiyanın Azərbaycandakı səfiri Vladimir Doroxin Azərbaycan Dövlət İqtisad Universitetinin tələbələri ilə görüşdə deyib.
Səfirin sözlərinə görə, Rusiya bu məsələdə yalnız vasitəçi ola bilər: “Hər hansı bir tərəfə təzyiq və ya zor vasitəsilə lazımi nəticə əldə etmək mümkün deyil. Təməldə etimad olmalıdır və onu yalnız münaqişə tərəfi olan ölkələr yarada bilər. Bu il aprel ayının əvvəlində baş verən hadisələr mövcud vəziyyətin nə qədər təhlükəli olduğunu bir daha göstərdi. Münaqişə tərəfləri və beynəlxalq ictimaiyyət bundan düzgün nəticə çıxarmalıdır. Rusiya da nəticə çıxaracaq və vasitəçilik səylərini artıracaq”.
1988-ci ildə ermənilər Azərbaycanın tərkibində muxtar vilayət olan Dağlıq Qarabağ bölgəsinin Ermənistana verilməsi tələbi ilə separatçı hərəkata başlayıblar. 1991-ci il sentyabrın 2-də Dağlıq Qarabağ özünü müstəqil dövlət elan edib. Ermənilər saxta qurumu “Dağlıq Qarabağ Respublikası” və ya “Arsax Respublikası” adlandırır.
1991-1994-cü illərdə Ermənistan Dağlıq Qarabağ vilayətini və onun ətrafındakı 7 rayonu işğal edib. 1994-cü ildə elan olunan atəşkəsdən bəri ATƏT-in Minsk qrupu çərçivəsində aparılan sülh danışıqları heç bir nəticə vermir.
Azərbaycanın Silahlı Qüvvələri 2016-cı il aprelin 2-dən 5-dək Qarabağ cəbhəsində atəşkəsi pozan işğalçı erməni birləşmələrinə qarşı cavab tədbiri keçirib. Əks-həmlədə Füzuli və Ağdərə istiqamətində yerləşən bəzi yüksəkliklər azad edilib.
