Böyük Britaniya şəriət məhkəmələrini yoxlayır
Böyük Britaniya hakimiyyəti bu ölkədə fəaliyyət göstərən şəriət məhkəmələrinin çıxardığı qərarlarla ölkənin hüquq sistemi arasındakı ziddiyyəti aradan qaldırmaq, şəriət məhkəmələrinin söykəndiyi qanunları milli qanunvericiliyə uyğunlaşdırmaq üçün araşdırma aparır. Böyük Britaniyanın daxili işlər naziri Tereza Mey mayın 27-də belə deyib.
Novator.az-ın məlumatına görə, Tereza Mey bildirib ki, araşdırma zamanı ən çox qadınlara münasibətdə yol verilən ayrı-seçkiliyə diqqət yetiriləcək. Nazir hesab edir ki, qadınlara qarşı diskriminasiya fundamental dəyərləri laxladır və insanlara sosial ziyan vurur: “Bəzi qadınlar şəriət məhkəmələrinin qəbul etdiyi qərarların qurbanına çevrilir, bu da ciddi təşviş yaradır. Bizim ölkədə hər bir vətəndaşın hüquq və təhlükəsizliyinə zəmanət verən yalnız bir hüquqi sistem var”.
Tədqiqatın artıq başlandığı və gələn il bitəcəyi bildirilir. Araşdırmanın nəticələri üzrə məruzə hazırlanacaq.
Böyük Britaniyada 85 şəriət məhkəməsi fəaliyyət göstərir.
