Rusiya: terrorçuluğa görə tutulanların ayrıca həbsxanalarda saxlanması müzakirə olunur
Rusiyada terrorçuluqda təqsirli bilinənlər üçün ayrıca həbsxanaların yaradılması məsələsi müzakirə olunur. Novator.az xəbər verir ki, Rusiya Daxili İşlər Nazirliyinin Ekstremizmlə Mübarizə Baş İdarəsinin nümayəndəsi Denis Kornikov bunu Federasiya Şurasının iclasında deyib.
Terrorçuluqda təqsirli bilinənlərin ayrıca həbsxanalarda saxlanması məsələsinə müxtəlif instansiyalarda, o cümlədən Federasiya Şurasında baxılır.
Terrorçuluğa görə tutulanların başqa məhbusları öz təsiri altına sala bilməməsi üçün ayrıca həbsxanalarda saxlanmasını 2015-ci ilin noyabrında Federasiya Şurasının sədr müavini İlyas Umaxanov təklif etmişdi.
MDB Antiterror Mərkəzi bəyan edib ki, terrorçular MDB məkanında fəaliyyətlərini genişləndirirlər. Mərkəzin hesabatına görə, belə təhlükəli qruplaşmaların təsiri altına daha çox hərbçilər, hüquq mühafizə orqanlarının əməkdaşları və məhbuslar düşür.
Hazırda Rusiya Dövlət Dumasında terrora və ekstremizmə görə məsuliyyətin sərtləşdirilməsi məqsədilə qanun layihələrinə baxılır. Bu layihələr artıq birinci oxunuşdan keçib. Deputatlar qanunvericiliyə beynəlxalq terrorçuluqla əlaqədar yeni maddənin salınmasını təklif edirlər. Beynəlxalq terrorçuluğa görə ömürlük həbs cəzası verilməsi təklif olunur.
