Yeni həbslər
Mayın 25-də Bakıda iki gənc saxlanılıb. Onlardan biri jurnalist, NİDA Vətəndaş Hərəkatının üzvü Amid Süleymanov, digəri yazıçı, fotoreportyor Elnur Muxtardır.
Hər iki gənci polis evlərindən tutub aparıb. Mənzillərdə axtarış aparılıb, Amid Süleymanovun kompüteri, telefonu, Elnur Muxtarın fotokamera və noutbuku götürülüb.
Saxlama və axtarışların nə ilə bağlı olduğu bilinmir, Daxili İşlər Nazirliyi hələ ki, bununla bağlı açıqlama yaymayıb.
Yeni həbslərin digər iki gəncin – Bayram Məmmədov və Qiyas İbrahimovun həbs işi ilə əlaqəli olması barədə sosial şəbəkələrdə versiyalar səslənir.
NİDA Vətəndaş Hərəkatının üzvü Bayram Məmmədov və siyasi fəal Qiyas İbrahimov mayın 11-də Bakıda polisin keçirdiyi əməliyyatlar nəticəsində tutulublar. Mayın 12-də hər iki gənc barəsində 4 aylıq həbs qətimkan tədbiri seçilib. Onlar Cinayət Məcəlləsinin 234.4.1-ci (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, qabaqcadan əlbir olan bir qrup şəxs tərəfindən və ya mütəşəkkil dəstə tərəfindən törədildikdə) və 234.4.3-cü (külli miqdarda törədildikdə) maddələri ilə ittiham olunurlar. Müdafiəçiləri isə gənclərin siyasi sifarişlə tutulduğunu iddia edirlər. Bildirilir ki, mayın 10-da gecə Bakının mərkəzində Heydər Əliyevin abidəsinin üzərində etirazçı şüarlar yazılıb. Müdafiəçiləri Bayram Məmmədov və Qiyas İbrahimovun bu şüarlara görə saxlandığını vurğulayırlar.
