Əl izləri kimə məxsusdur? Vəkil vəsatətlər qaldırıb
Vəkil Elçin Sadıqov həbsdə olan gənclər Qiyas İbrahimov və Bayram Məmmədovla bağlı vəsatətlər qaldırıb.
Qiyas İbrahimov və Bayram Məmmədov mayın 10-da tutulublar. Mayın 12-də Xətai Rayon Məhkəməsində onların hər ikisi barəsində 4 ay müddətinə həbs qətimkan tədbiri seçilib. Hazırda Bakı İstintaq Təcridxanasında saxlanan gənclər Cinayət Məcəlləsinin 234.4.1-ci (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, qabaqcadan əlbir olan bir qrup şəxs tərəfindən və ya mütəşəkkil dəstə tərəfindən törədildikdə) və 234.4.3-cü (külli miqdarda törədildikdə) maddələri ilə ittiham olunurlar.
Cinayət Məcəlləsinə görə, bu maddələrlə təqsirli bilinən şəxslər əmlakı müsadirə olunmaqla 5 ildən 12 ilədək müddətə azadlıqdan məhrumetmə ilə cəzalandırılır.
Daxili İşlər Nazirliyi bəyan edib ki, Bayram Məmmədovun üzərindən 2,9 qram, evindən 1 kilo 150 qram heroin, Qiyas İbrahimovun üzərindən 2,6 qram, yaşadığı mənzildən 1 kilo 10 qram heroin tapılıb. Müdafiəçiləri isə hər iki gəncin siyasi sifarişlə tutulduğunu iddia edirlər. Bildirilir ki, mayın 10-na gecə Bakının mərkəzində Heydər Əliyevin abidəsinin üzərində etirazçı şüarlar yazılıb. Müdafiəçiləri gənclərin bu şüarlara görə saxlandığını vurğulayırlar.
Novator.az-ın məlumatına görə, vəkil Elçin Sadıqov mayın 23-də Facebook sosial şəbəkəsində yazıb ki, qaldırdığı vəsatətlər gənclərdən aşkar olunduğu iddia edilən narkotik vasitələrin büküldüyü bükümlərin və qablaşdırıldığı polietilen torbaların üzərində olan əl-barmaq izlərinin götürülməsi, onların kimə məxsus olmasının müəyyən edilməsi məqsədilə ekspertiza təyin edilməsi barədədir.
Vəkil Qiyas İbrahimovla bağlı vəsatətini Bakı Şəhər Baş Polis İdarəsinin İstintaq və Təhqiqat İdarəsinin müstəntiqi Murad Quliyevə təqdim edib. Həmin vəsatətində Elçin Sadıqov təyin ediləcək ekspertiza qarşısında bu sualların qoyulmasını istəyib:
Elçin Sadıqov Bayram Məmmədovla bağlı vəsatətini Bakı Şəhər Baş Polis İdarəsinin İstintaq və Təhqiqat İdarəsinin müstəntiqi Həbib Həbibliyə təqdim edib. Vəkil həmin vəsatətində ekspertiza qarşısında bu sualların qoyulmasını istəyib:
Hər iki vəsatətində Elçin Sadıqov əməliyyatlarda iştirak etmiş polis nəfərlərinin, Bakı Şəhər Baş Polis İdarəsinin Narkotiklərlə Mübarizə İdarəsinin rəisinin, müavinlərinin və bütün işçilərinin əl-barmaq izlərinin, eyni zamanda Qiyas İbrahimovla Bayram Məmmədovun əl-barmaq izlərinin götürülərək ekspertizaya təqdim olunmasını da xahiş edib.
Vəkil hesab edir ki, bu vəsatətlər təmin olunsa, Qiyas İbrahimov və Bayram Məmmədovun heroinləri onların cibinə və evinə polis əməkdaşlarının qoyduğu barədə ifadələri təsdiqini tapacaq.
