Ukraynanın dördüncü böyük şəhərinin adı dəyişdirildi
Mayın 19-da Ukrayna parlamenti (Ali Rada) Dnepropetrovsk vilayət mərkəzinin adını dəyişib. Şəhərə Dnepr adı verilib. Novator.az-ın məlumatına görə, qərarı parlamentin 247 deputatı dəstəkləyib. Qərarın qəbul olunması üçün 226 deputatın səsi kifayət edirdi.
Dnepropetrovsk şəhərinin adının dəyişdirilməsi dekommunizasiya qanununun icrası çərçivəsində həyata keçirilib.
Ali Rada Dnepropetrovskdan başqa ölkənin yüzdən çox yaşayış məntəqəsinə də yeni adlar verib. Dnepropetrovsk vilayətinin Dneprodzerjinsk şəhərinin də adı dəyişdirilib. Bu şəhər Kamenskoye adlandırılıb.
Dnepropetrovsk əhalisinin sayına görə Kiyev, Xarkov və Odessadan sonra Ukraynanın dördüncü şəhəridir. Şəhərdə 1 milyon nəfərə yaxın adam yaşayır.
Dnepropetrovsk şəhərinin adı 1776-1796 və 1802-1926-cı illərdə Yekaterinoslav, 1796-1802-cı illərdə Novorossiysk olub. Şəhərə Dnepropetrovsk adı SSRİ dövründə – 1926-cı ildə verilmişdi.
