Atanın uşağın sağlamlığına təsiri ilə bağlı araşdırma nəyi üzə çıxarıb?
ABŞ alimləri atanın uşağın sağlamlığına təsiri ilə bağlı müxtəlif tədqiqatlar aparıblar. Novator.az-ın məlumatına görə, araşdırmalar göstərib ki, ana kimi atanın da yaşı və həyat tərzi genetik funksiyalara nəzarət edən molekullarda əksini tapa bilər.
Molekulyar biologiya və biokimya üzrə mütəxəssis, ABŞ-ın Corctaun Universitetinin professoru Coanna Kitlinska bildirib ki, ata nəinki öz uşağına, hətta nəslin gələcəyinə də təsir edir. Məsələn, ana heç vaxt alkoqollu içki qəbul etməsə də, atanın içki düşkünü olması uşaqda fetal alkoqol sindromu formalaşdıra bilər. Professorun sözlərinə görə, fetal alkoqol sindromlu uşaqların 75%-dən çoxunun atası içki düşkünüdür. Bu da onu göstərir ki, atanın spirtli içki qəbul etməsi uşağa ciddi mənfi təsir göstərir.
Araşdırma kişinin yaşlı vaxtında dünyaya gələn uşaqda şizofreniya və autizm riskinin daha yüksək olduğunu da üzə çıxarıb. Atanın artıq çəkili olması isə uşaqda diabet, piylənmə və beyin xərçəngi yarada bilər.
Alimlərin fikrincə, atanın spirtli içki qəbul etməsi uşağın arıq, beyninin kiçik ölçülü olmasına və təfəkkür funksiyasının pozulmasına gətirə bilər.
