Rusiya “Azadlıq” radiosunun “Krım.Reali” saytına girişi dayandırıb
Mayın 12-dən Rusiyada və Rusiyanın işğal etdiyi Krım bölgəsində “Krım.Reali” internet nəşrinə giriş dayandırılıb. Novator.az xəbər verir ki, işğal altında olan Krım bölgəsinin prokurorluğu belə məlumat yayıb.
2014-cü ildən fəaliyyət göstərən “Krım.Reali” saytı “Azadlıq” radiosunun layihəsidir. Saytın redaksiyası Ukrayna paytaxtı Kiyevdə yerləşir, müxbirləri arasında Krım sakinləri də var.
Aprel ayında Rusiyanın güc strukturları “Krım.Reali”nin Krımdakı müxbirlərinin fəaliyyət göstərdiyi məkanlarda axtarışlar aparıb və müxbirlərdən birinə – Nikolay Semenaya qarşı cinayət işi qaldırılıb. Federal Təhlükəsizlik Xidməti jurnalisti ekstremizmə çağırışda ittiham edir, onun məqalələrində Rusiyanın ərazi bütövlüyünün pozulmasına çağırışlar olduğunu iddia edir.
Ukraynanın Krım bölgəsini 2014-ci ildə Rusiya işğal edərək özünə birləşdirib.
