“Mədəniyyət sahəsinə marağın yüksəldilməsi” layihəsinin icrasına başlanıb
“Savadlı Cəmiyyət” Müasir Təhsilə Dəstək İctimai Birliyi “Mədəniyyət sahəsinə marağın yüksəldilməsi” layihəsinin icrasına başlayıb.
Mədəniyyət və Turizm Nazirliyinin dəstəklədiyi layihə 3 ay ərzində gerçəkləşəcək. Layihənin icrasında məqsəd gənclər arasında mədəni maarifləndirməni yüksəltmək, mədəni fəaliyyətdə iştirakçılığın artırılması üçün könüllülük fəaliyyətini həvəsləndirməkdir.
Layihə Bakı və Xırdalanda orta məktəb, kollec, peşə təhsili və ali təhsil müəssisələrində oxuyan yeniyetmə və gənclərin iştirakı ilə reallaşdırılacaq.
Ümumilikdə layihədən 1500 nəfərdən çox adamın faydalanması hədəf götürülüb.
Layihə çərçivəsində “Könüllülük hərəkatının əsas üstünlükləri”, “Könüllülüyün cəmiyyətə töhfəsi”, “Könüllülü olmağın yolları”, “Könüllülərin vəzifəsi və statusu”, “Əhalinin mədəni maarifləndirilmə səviyyəsinin yüksəldilməsi mexanizmləri”, “Mədəni fəaliyyətdə iştirakçılığın artırılması yolları”, “Sosial-mədəni həyat tərzinin təbliği” və başqa mövzularda təlimlər keçiriləcək, bukletlər paylanacaq, təhsil müəssisələrində təbliğat plakatları yerləşdiriləcək.
Təbliğat aparılan ərazilərdə yeniyetmə və gənclər – əsasən qaçqınlar və məcburi köçkünlər, valideyn himayəsindən məhrum olan uşaqlar, əlillər və sağlamlıq imkanları məhdud uşaqlar arasında xüsusi istedadlı və yaradıcı şəxslər müəyyən ediləcək. Mütəxəssislər onlara müxtəlif əl işlərinin hazırlanması metodlarını öyrədəcəklər. Kurslar zamanı hazırlanmış əl işlərindən ibarət “Xüsusi istedadlar” adlı sərgi təşkil olunacaq.
