Zaqatalada əməliyyat: 6 nəfər tutulub, odlu silahlar, qadağan edilmiş dini ədəbiyyat götürülüb
Daxili işlər, prokurorluq orqanlarının və Dövlət Təhlükəsizliyi Xidmətinin əməkdaşları Zaqatala rayonunda əməliyyat keçiriblər.
Daxili İşlər Nazirliyinin, Dövlət Təhlükəsizliyi Xidmətinin və Baş Prokurorluğun mətbuat xidmətlərinin yaydığı məlumata görə, əməliyyat nəticəsində bölgədə dini dözümsüzlük və bölücülük meylləri yayan, vətəndaşları hədə-qorxu və digər zorakı üsullarla öz sıralarına cəlb etməyə çalışan, əhali arasında pozuculuq işləri aparan Zaqatala rayon sakinləri Elşad Musayev, Abakar Qazıyev, İslam Ağalarov, Vüqar Cəbrayılov, Bəşir Həmzəyev və Vaqif Padarov saxlanılıblar.
Rəsmi məlumatda bildirilir ki, üzərlərinə və yaşadıqları ünvanlara baxış zamanı onlardan 2 ədəd avtomat silah, 2 tapança, 13 əl qumbarası, 310 ədəd müxtəlif çaplı patron, 5 trotil şaşkası, həmçinin təbliği və yayılması qanunla qadağan edilmiş xeyli sayda dini ədəbiyyat aşkarlanaraq götürülüb.
Faktla bağlı Cinayət Məcəlləsinin müvafiq maddələri ilə cinayət işi başlanıb, istintaq aparılır.
Məlumatda vurğulanır ki, mütəşəkkil dəstənin cinayətkar əlaqələrinin ifşası, habelə, digər üzvlərinin müəyyən olunaraq məsuliyyətə cəlb edilməsi istiqamətində təxirəsalınmaz istintaq və əməliyyat-axtarış tədbirləri davam etdirilir.
