Ermənistan Dağlıq Qarabağı tanımaq məsələsini müzakirəyə çıxarır
Ermənistan hökuməti mayın 5-də keçiriləcək iclasının gündəliyinə Dağlıq Qarabağı müstəqil dövlət kimi tanımaq barədə qanun layihəsinin müzakirəsini daxil edib. Layihənin müəllifləri deputatlar Zarui Postancyan və Qrant Baqratyandır. Sonuncu əvvəllər Ermənistanın baş naziri postunu tutub.
Novator.az xəbər verir ki, hökumətin iclasında layihəni xarici işlər naziri Edvard Nalbandyan təqdim edəcək. Layihə dəstək qazansa, parlamentə göndəriləcək.
Dağlıq Qarabağı müstəqil dövlət kimi tanımağı nəzərdə tutan layihənin müəllifləri qeyd edir ki, məsələ Ermənistanla bölgə təmsilçilərinin apardığı müzakirələrin nəticəsidir, hazırkı xarici amillərdən və gələcək mümkün proseslərdən qaynaqlanır.
1923-cü il iyulun 7-də Azərbaycan Sovetləri Mərkəzi İcraiyyə Komitəsinin dekreti ilə Azərbaycan Sovet Sosialist Respublikasının tərkibində Dağlıq Qarabağ Muxtar Vilayəti yaradılıb.
1991-ci il sentyabrın 2-də Dağlıq Qarabağ özünü müstəqil dövlət elan edib. Həmin il noyabrın 26-da Azərbaycan Respublikası parlamentinin qərarı ilə Dağlıq Qarabağ Muxtar Vilayəti ləğv olunub.
Dağlıq Qarabağın statusuna görə, muxtar vilayət Əsgəran, Hadrut, Mardakert, Martuni, Şuşa rayonları və vilayət tabeli Stepanakert şəhərindən ibarət olub.
Hazırda bölgədə işğalçı rejim hakimdir. 1991-1993-cü illərdə Ermənistan Dağlıq Qarabağ vilayətini və daha 7 rayonu işğal edib.
