Almaniyada əks-kəşfiyyat 90 məscidi nəzarətə götürüb
Almaniyada 90 məscid əks-kəşfiyyatın müşahidəsi altındadır.
Almaniyada əks-kəşfiyyat orqanı Konstitusiyanı Mühafizə İdarəsi adlanır. 90 məscidin əks-kəşfiyyatın müşahidəsi altında olduğunu həmin idarənin rəhbəri Hans-Georq Maassen ARD telekanalının efirində açıqlayıb.
Novator.az-ın məlumatına görə, Massen deyib ki, Almaniyada çoxlu islamçı ocaqlar var: “Biz onları nəzarətdə saxlamalıyıq. Söhbət gəncləri terrora çağıran, o qədər də diqqət cəlb etməyən yerlərdəki məscidlərdən gedir”.
Massen bildirib ki, əks-kəşfiyyatın ölkədə yaşayan müsəlmanları izləmək planı yoxdur, amma Konstitusiyanı Mühafizə İdarəsi dini və siyasi ekstremistlərə nəzarət edir: “Ekstremizmə qarşı koalisiya yaratmaq üçün hakimiyyətin müsəlman cəmiyyətləri ilə əməkdaşlığa ehtiyacı var”.
Massen Almaniyada hələ də terror təhlükəsinin qaldığını vurğulayıb.
Konstitusiyanı Mühafizə İdarəsinin hesabatına görə, Almaniyanın 800 vətəndaşı İŞİD terror qruplaşmasında vuruşmaq üçün Suriya və İraqa yollanıb. Onlardan 260-ı Almaniyaya qayıdıb.
