Meksikada ölkə boyu cinsi zorakılıq əleyhinə aksiyalar keçirilib
Meksika tarixində ilk dəfə olaraq qadınlara qarşı cinsi zorakılıq əleyhinə ümummilli aksiyalar keçirilib.
Novator.az xəbər verir ki, aprelin 24-də ölkənin 27 bölgəsinin 40-dan çox şəhərində “Bir ölümə belə imkan verməyəcəyik”, “Qadınlara qarşı zorakılığı dayandırın” kimi şüarlar altında aksiyalar təşkil olunub. Paytaxt Mexikoda keçirilən aksiyada on minlərlə adam iştirak edib. Aksiyalarda heç bir insident baş verməyib.
Aksiya iştirakçıları hakimiyyətdən gender bərabərliyini təmin etməyi və cinsi diskriminasiya əleyhinə mübarizə aparmağı tələb ediblər.
122 milyon əhalisi olan Meksikanın hər 10 sakinindən 6-sı zorakılığa məruz qalır. Onlar ən çox ailə üzvlərinin və yaxın tanışlarının zorakılığı ilə qarşılaşırlar. Hər gün Meksikada orta hesabla 7 qadın öldürülür, amma bu cinayətlərin cüzi hissəsi açılır.
