Müdafiə Nazirliyindən sosial şəbəkə istifadəçilərinə çağırış
Müdafiə Nazirliyinin mətbuat xidməti işğaldan azad olunmuş ərazilərdən foto və video yayan sosial şəbəkə istifadəçilərinə müraciət edib.
Müraciətdə deyilir ki, işğaldan azad olunmuş torpaqlara səfər edən dövlət, qeyri-hökumət təşkilatları, ictimaiyyət, media nümayəndələri, o cümlədən mədəniyyət və incəsənət xadimləri olduqları ərazilərdə apardıqları foto və video çəkilişləri, təəssüflər olsun ki, internet informasiya resursları vasitələri ilə yayırlar.
Nazirliyin mətbuat xidməti bildirir ki, belə foto və videoların yayılması müdafiə maraqlarımıza ziddir, hazırda ön xətdə yerləşən hərbi qulluqçularımızın təhlükəsizliyinə təhdid yaradır, eləcə də düşmən kəşfiyyatı üçün maraqlıdır. Bunu nəzərə alaraq Müdafiə Nazirliyinin mətbuat xidməti sosial şəbəkələrdə şəxsi profillərdə mövcud olan görüntülərin təcili surətdə silinməsini xahiş edir, gələcəkdə bu tipli foto və videoların yerləşdirilməməsini təkidlə tövsiyə edir.
Mətbuat xidməti bu tədbirdə hamını yaxından iştirak etməyə çağırır.
