Rusiya “Azadlıq”ın layihəsini araşdırır
Rusiyanın güc strukturları “Krım.Reali” internet nəşrinin Krımdakı müxbirlərinin fəaliyyət göstərdiyi məkanlarda axtarışlara başlayıb. Xəbəri Krımın sosial şəbəkə istifadəçiləri yayıb.
Ukraynanın Krım bölgəsini 2014-ci ildə Rusiya işğal edərək özünə birləşdirib.
“Krım.Reali” ABŞ Konqresinin maliyyələşdirdiyi “Azadlıq” radiosunun layihəsidir.
Novator.az xəbər verir ki, işğal edilmiş Krım bölgəsinin prokurorluğu “Krım.Reali”nin müxbirlərinin fəaliyyət göstərdiyi məkanlarda axtarış aparıldığını təsdiqləyib. Prokurorluqdan bildiriblər ki, axtarış ekstremist fəaliyyətə açıq çağırışlarla bağlı başlanan cinayət işi ilə əlaqədardır. Prokurorluğun iddiasına görə, “Krım.Reali”nin ru.krymr.com saytında yerləşdirilmiş bir yazıda müəllif Krım yarımadasını və onun sakinlərini, o cümlədən hərbi əməliyyatları təcrid etməyə çağırıb. Araşdırmanın prokuror Natalya Poklonskayanın nəzarətində olduğu bildirilir.
“Krım.Reali”nin əməkdaşları saytın “Azadlıq” radiosunun layihəsi olduğunu gizlətmirlər. Saytın redaksiyası Ukrayna paytaxtı Kiyevdə yerləşsə də, müxbirləri arasında Krım sakinləri də var.
