Ukraynada yeni baş nazir
Aprelin 14-də Ukrayna parlamenti (Ali Rada) ölkə prezidenti Pyotr Poroşenkonun təqdimatına baxaraq Vladimir Qroysmanı baş nazir postuna təsdiqləyib. Novator.az xəbər verir ki, təyinata 257 deputat tərəfdar çıxıb.
Vladimir Qroysman bu günədək Ali Radanın sədri idi.
1978-ci ildə Ukraynanın Vinnitsa vilayətində anadan olan Vladimir Qroysman yəhudidir. 16 yaşından kommersiya strukturlarında rəhbər vəzifələrdə işləyib. 2003-cü ildə Personalı İdarəetmə Regionlararası Akademiyasını, 2010-cu ildə isə Dövlət İdarəçiliyi Milli Akademiyasını bitirib.
Vladimir Qroysman Ukrayna parlamentinə 2014-cü il noyabrın 27-dən sədrlik edirdi. O, prezident Pyotr Poroşenkonun blokunun təmsilçisidir. Hökumətdə baş nazirin müavini-regional inkişaf, tikinti və mənzil-kommunal təsərrüfatı naziri postunu tutub.
Ukraynanın əvvəlki baş naziri Arseni Yatsenyuk aprelin 10-da istefa verib. Buna koalisiyanın dağılması səbəb olub.
