Ermənistanın Müdafiə Nazirliyi son döyüşlərdəki itkilərini açıqlayıb
Ermənistanın Müdafiə Nazirliyi Azərbaycan ordusu ilə son döyüşlərdə 92 nəfərin öldüyünü açıqlayıb. Transparency.az xəbər verir ki, Azərbaycanın Qarabağ bölgəsində aprelin 2-dən 5-dək 64 erməni hərbi qulluqçunun öldüyü bildirilir. Ermənistanın Müdafiə Nazirliyinin hesabatına görə, onların 15-i zabit, 15-i müqavilə əsasında xidmət keçənlər, 34-ü müddətli hərbi qulluqçu olub.
Bundan başqa, Qarabağdakı döyüşlərdə 13 könüllünün öldüyü, kapitan rütbəli 1 zabitin isə itkin düşdüyü açıqlanıb.
Ermənistan-Azərbaycan sərhədində isə, Ermənistanın Müdafiə Nazirliyinin məlumatına görə, aprelin 2-dən 13-dək 15 erməni (9 hərbi qulluqçu, 2 könüllü, 4 sakin) ölüb.
1988-ci ildə başlayan Qarabağ müharibəsində Ermənistan Azərbaycanın Dağlıq Qarabağ bölgəsini və Laçın, Kəlbəcər, Qubadlı, Zəngilan, Cəbrayıl, Füzuli, Ağdam rayonlarını, eləcə də Qazax rayonunun 7, Naxçıvan Muxtar Respublikasının 1 kəndini işğal edib. 1994-cü ildə elan olunan atəşkəsdən bəri sülh danışıqları heç bir nəticə vermir.
Azərbaycanın Silahlı Qüvvələri aprelin 2-dən 5-dək Qarabağ cəbhəsinin bir neçə istiqamətində atəşkəsi pozan işğalçı erməni birləşmələrinə qarşı cavab tədbiri keçirib. Əks-həmlə zamanı erməni birləşmələrinin birinci müdafiə xətti cəbhənin bəzi istiqamətlərində yarılıb, keçmiş Ağdərə rayonu və Füzuli rayonu istiqamətində yerləşən bəzi yüksəkliklər azad edilib.
