Şəhid zabitlərlə vida mərasimi
Ermənistan və Azərbaycan qoşunlarının təmas xəttində baş vermiş son hərbi əməliyyatlarda “Mi-24” helikopterinin vurulması zamanı şəhid olan pilotlar – mayor Urfan Vəlizadənin, mayor Təbriz Musazadənin, baş leytenant Bəkir İsmayılovun, eləcə də polkovnik-leytenant Murad Mirzəyevin aprelin 11-də Müdafiə Nazirliyinin Təlim və Tədris Mərkəzində vida mərasimi keçirilib.
AZƏRTAC xəbər verir ki, vida mərasimində dövlət və hökumət rəsmiləri, o cümlədən müdafiə naziri general-polkovnik Zakir Həsənov, müdafiə nazirinin birinci müavini – Silahlı Qüvvələrin Baş Qərargah rəisi general-polkovnik Nəcməddin Sadıqov, baş prokurorun müavini-respublika hərbi prokuroru Xanlar Vəliyev, Milli Məclisin deputatları, şəhidlərin ailə üzvləri, hərbçilər, ictimaiyyətin nümayəndələri iştirak ediblər.
Müdafiə naziri Zakir Həsənov mərasimdə çıxış edərək şəhidlərimizin qısasının düşməndən alınacağını, torpaqlarımızın tezliklə işğaldan azad olunacağını bildirib.
Şəhidlərin dördü də II Fəxri xiyabanda dəfn edilib.
