Müdafiə nazirinin sabiq müavininə 10 il iş istədilər
Bakı Ağır Cinayətlər Məhkəməsində müdafiə nazirinin sabiq müavini Mehman Səlimovun işi üzrə proses başa çatır.
1995-1999-cu illərdə müdafiə nazirinin siyasi və ictimai işlər üzrə müavini olmuş Mehman Səlimov 2014-cü ilin noyabr ayında həbs edilib. Baş Prokurorluğun Ağır Cinayətlərə Dair İşlər üzrə İstintaq İdarəsi Mehman Səlimovun işini Cinayət Məcəlləsinin 179.3.2-ci (külli miqdarda mənimsəmə) və 308.2-ci (vəzifə səlahiyyətlərindən sui-istifadə etmə) maddələri ilə araşdırıb.
APA-nın məlumatına görə, aprelin 8-i Bakı Ağır Cinayətlər Məhkəməsində hakim Zeynal Ağayevin sədrliyi ilə keçirilən prosesdə dövlət ittihamçısı çıxış edib. Prokuror Mehman Səlimovun 10 il müddətinə azadlıqdan məhrum edilməsini istəyib.
Təqsirləndirilənin vəkili məhkəmə tərkibinə etiraz vəsatəti verib. O bildirib ki, proses zamanı verilən vəsatətlərin heç biri təmin edilməyib, Mehman Səlimovun hüquqları pozulub. Vəsatətlər baxılmamış saxlanıb, məhkəmə istintaqının tamamlandığı elan olunub. Proses aprelin 15-də davam edəcək.
