İslandiyada yeni baş nazir
İslandiyanın balıqçılıq və kənd təsərrüfatı naziri Siqurdur İnqi Yohannsson baş nazir postuna gətirilib. Novator.az xəbər verir ki, bunu mediaya Siqurdur İnqi Yohannssonun özü açıqlayıb.
İslandiyanın əvvəlki hökumət başçısı Siqmyundyur Gyunnleyqsson “Panama sənədləri” ilə əlaqədar istefaya gedib.
Bu yaxınlarda dünyanın ən qapalı şirkətlərindən olan Panamanın “Mossack Fonseca” hüquq firmasından 11 milyon sənəd Britaniya mediasına sızıb. Britaniya mediası həmin sənədləri təhlil edərək “Panama sənədləri” adı altında geniş bir araşdırma materialı dərc edib. Sənədlər göstərir ki, “Mossack Fonseca” firması çirkli pulları yumaq, sanksiyalardan yan keçmək və vergidən yayınmaq istəyən xeyli müştəriyə xidmət edirmiş. Firmanın belə müştəriləri arasında ictimai-siyasi şəxslər, ö cümlədən 72 hazırkı və keçmiş dövlət başçısı da var. Onlardan biri də Siqmyundyur Gyunnleyqssondur.
“Panama sənədləri”nə görə, Gyunnleyqsson 2007-ci ildə xanımı ilə birlikdə Britaniyanın Virciniya adalarında “Wintris Inc.” ofşor şirkətini təsis edib. Şirkət şəxsi məqsədlərlə yaradılıb.
Baş nazir postuna təyin olunmuş Siqurdur İnqi Yohannsson deyib ki, yeni vəzifə yaxşı imkandır, amma bu imkan qəribə vəziyyətdə yaranıb: “Baş nazir kimi mənim üçün siyasətdə və siyasətçilər arasında etimadı qazanmaq vacibdir”.
