General-mayor Natiq Əliyev: “Düşmən sanitar tibb maşınını atəşə tutub”
Müdafiə Nazirliyinin mətbuat xidməti xəbər verir ki, qoşunların təmas xəttində hərbi əməliyyatların dayandırılması barədə tərəflərin əldə etdiyi razılaşmaya baxmayaraq Ermənistan silahlı qüvvələrinin bölmələri müxtəlif istiqamətlərdə mövqelərimizi və yaşayış məntəqələrimizi atəşə tutmaqda davam edir.
Müdafiə Nazirliyinin Tibb Baş İdarəsinin rəisi, tibb xidməti general-mayoru Natiq Əliyev nazirliyin mətbuat xidmətinə bildirib ki, aprelin 7-də cəbhənin Ağdərə-Goranboy istiqamətində düşmən tərəfindən atəşkəsin növbəti dəfə pozulması nəticəsində yaralanan və xəsarət alan mülki əhalini təxliyyə edən sanitar tibb maşını atəşə tutulub.
Hadisə nəticəsində sanitar maşına ciddi ziyan dəysə də, xoşbəxtlikdən xəsarət alan olmayıb.
General-mayor Natiq Əliyev ermənilərin törətdiyi bu hadisəni beynəlxalq hüquq normalarının kobud şəkildə pozulması kimi dəyərləndirib.
