Tapqaraqoyunlu yaxınlığında mövqelərimiz atəşə tutulur
Müdafiə Nazirliyinin mətbuat xidməti yeni məlumat yayıb.
Məlumatda deyilir: “Moskva şəhərində Azərbaycan və Ermənistan silahlı qüvvələrinin baş qərargah rəisləri arasında hərbi əməliyyatların dayandırılmasına dair əldə edilmiş razılaşmaya baxmayaraq Ermənistan ordusunun bölmələri atəşkəsi yenə də pozmaqdadır.
Hazırda Goranboy rayonunun Tapqaraqoyunlu yaşayış məntəqəsi yaxınlığındakı mövqelərimiz 60, 82 və 120 millimetrlik minaatanlardan intensiv olaraq atəşə tutulur.
Azərbaycan tərəfi razılaşmaya əməl edərək hələ ki, cavab atəşi açmır”.
Aprelin 2-dən Azərbaycanın Silahlı Qüvvələri Ağdərə-Tərtər-Ağdam və Xocavənd-Füzuli istiqamətində atəşkəsi pozan erməni birləşmələrinə qarşı cavab tədbiri keçirib. Əməliyyatlar zamanı Azərbaycan 31 hərbçisini itirib. Erməni tərəfin itkisi daha çoxdur.
Aprelin 5-də Rusiya tərəfinin vasitəçiliyi ilə Moskvada Azərbaycan Silahlı Qüvvələrinin Baş Qərargah rəisi, general-polkovnik Nəcməddin Sadıqovla Ermənistan Silahlı Qüvvələrinin Baş Bərargah rəisi, general-polkovnik Yuri Xaçaturov arasında görüş keçirilib. Görüşdə Azərbaycan-Ermənistan qoşunların təmas xəttində hərbi əməliyyatların dayandırılmasına dair razılıq əldə edilib.
