Putinlə Nazarbayev Qarabağı müzakirə edib
Rusiya prezidenti Vladimir Putin Qazaxıstan prezidenti Nursultan Nazarbayevlə Azərbaycanın işğal olunmuş Dağlıq Qarabağ bölgəsindəki vəziyyəti müzakirə edib.
Novator.az bildirir ki, aprelin 6-da Kremlin mətbuat xidməti Putinlə Nazarbayevin arasında telefon danışığı olduğu haqda açıqlama yayıb. Açıqlamada deyilir ki, Rusiya və Qazaxıstan prezidentləri Dağlıq Qarabağdakı vəziyyətlə bağlı fikir mübadiləsi apararaq münaqişənin sülh yolu ilə həllini müzakirə ediblər. Putin qazaxıstanlı həmkarına Dağlıq Qarabağda vəziyyətin normallaşdırılması istiqamətində Rusiyanın vasitəçiliyilə atılan addımlar haqda məlumat verib.
Aprelin 2-dən Azərbaycanın Silahlı Qüvvələri Ağdərə-Tərtər-Ağdam və Xocavənd-Füzuli istiqamətində atəşkəsi pozan erməni birləşmələrinə qarşı cavab tədbiri keçirib. Əməliyyatlar zamanı Azərbaycan 31 hərbçisini itirib. Erməni tərəfin itkisi daha çoxdur.
Aprelin 5-də Azərbaycan və Ermənistan qoşunlarının təmas xəttində tərəflərin razılığı ilə əməliyyatlar dayandırılıb.
1988-ci ildə Azərbaycanın Dağlıq Qarabağ bölgəsində Ermənistana birləşmək istəyi ilə separatçı hərəkat başlayıb. Bu hərəkat müharibə ilə nəticələnib. 1991-ci ildə Dağlıq Qarabağ bölgəsi müstəqillik elan edib, savaş şiddətlənib. Hazırda Dağlıq Qarabağ bölgəsi və onun ətrafındakı digər 7 Azərbaycan rayonu Ermənistanın işğalı altındadır. 1994-cü ildə elan olunan atəşkəsdən bəri sülh danışıqları heç bir nəticə vermir.
