Atəş dayandırılıb
Azərbaycanın Müdafiə Nazirliyi yeni rəsmi məlumat yayıb. Nazirlik bildirir ki, aprelin 5-i saat 12-dən Azərbaycan və Ermənistan qoşunlarının təmas xəttində tərəflərin razılığı ilə əməliyyatlar dayandırılıb.
Məlumata görə, Azərbaycan Silahlı Qüvvələrinin bölmələri azad edilmiş torpaqlarda möhkəmləndirmə işləri həyata keçirir.
Aprelin 2-də Azərbaycanın Silahlı Qüvvələri Ağdərə-Tərtər-Ağdam və Xocavənd-Füzuli istiqamətində atəşkəsi pozan erməni birləşmələrinə qarşı cavab tədbiri keçirib. Əks-həmlə zamanı erməni birləşmələrinin birinci müdafiə xətti cəbhənin bəzi istiqamətlərində yarılıb, Talış kəndi ətrafındakı yüksəkliklər, eləcə də Seysulan məntəqəsi düşmən qüvvələrindən tam təmizlənib. Füzuli rayonu istiqamətində yerləşən strateji əhəmiyyətli “Lələ təpə” yüksəkliyi də Azərbaycan bölmələrinin nəzarətinə keçib.
