Həmsədrlər cəbhədəki gərginliklə bağlı bəyanat veriblər
ATƏT-in Minsk qrupunun həmsədrləri Ermənistan və Azərbaycan qoşunlarının təmas xəttində baş vermiş ən son hadisələrlə bağlı birgə bəyanat yayıblar.
ATƏT-in rəsmi saytına yerləşdirilmiş bəyanatda həmsədrlər Dağlıq Qarabağ münaqişəsi zonasında təmas xətti boyunca atəşkəsin genişmiqyaslı pozulmasından ciddi narahatlıqlarını ifadə ediblər. Güc tətbiqini kəskin şəkildə pisləyən həmsədrlər aralarında mülki şəxslərin də olduğu insan itkisinə görə təəssüfləndiklərini bildiriblər.
Həmsədrlər tərəfləri atəşi dayandırmağa və ərazidə vəziyyəti sabitləşdirməyə yönəlmiş bütün lazımi tədbirləri görməyə çağırıb, həmçinin münaqişənin sülh yolu ilə həllinə başqa alternativin olmadığını qeyd ediblər.
ATƏT-in Minsk qrupunun həmsədrləri yaranmış vəziyyətlə bağlı aprelin 4-də Vyanada görüşəcək və ertəsi gün Dağlıq Qarabağda gərginliyin artmasını müzakirə etmək məqsədilə Minsk qrupunun toplantısını keçirəcək.
AZƏRTAC
