“Ermənistan təxribat törədib, lazımi cavabını alıb” – İlham Əliyev Ərdoğana belə deyib
Türkiyə prezidenti Rəcəb Teyyub Ərdoğan aprelin 2-də Azərbaycan prezidenti İlham Əliyevə telefonla zəng edib.
Azərbaycan prezidentinin mətbuat xidmətinin məlumatında deyilir ki, Türkiyə prezidenti Ermənistan-Azərbaycan qoşunlarının təmas xəttində baş vermiş hadisələrlə bağlı dəstəyini və həmrəyliyini ifadə edib, Türkiyə xalqının hər zaman Azərbaycan xalqının yanında olduğunu bildirib. Ərdoğan Ermənistanın təxribatı nəticəsində hərbi qulluqçularımızın həlak olması ilə bağlı başsağlığı verib.
Prezident İlham Əliyev başsağlığına görə minnətdarlığını bildirib və təşəkkür edib. İlham Əliyev Dağlıq Qarabağ münaqişəsinin həlli işində Türkiyənin hər zaman dəstəyinə görə minnətdarlığını çatdırıb, qardaş Türkiyə xalqına dərin hörmətini ifadə edib.
Prezident İlham Əliyev bildirib ki, Ermənistan qoşunların təmas xəttində növbəti dəfə təxribat törədib, Azərbaycanın mövqelərinə hücum çəkib. Azərbaycan Silahlı Qüvvələri hücumu dəf edib, qarşı tərəf lazımi cavabını alıb.
Aprelin 2-də Belarus prezidenti Aleksandr Lukaşenko da Azərbaycan prezidenti İlham Əliyevə telefonla zəng edib. Belarus prezidenti Ermənistan-Azərbaycan qoşunlarının təmas xəttində baş vermiş son hadisələrlə bağlı narahatlığını bildirib. İlham Əliyev Aleksandr Lukaşenkonu son hadisələrlə bağlı məlumatlandıraraq qeyd edib ki, Azərbaycan Silahlı Qüvvələri Ermənistan tərəfinin törətdiyi növbəti təxribatın və mövqelərimizə hücumun qarşısını alıb, qarşı tərəfə lazımi cavab verib.
