Əkrəm Əylisli saxlanıldı. DİN təsdiqlədi
Yazıçı Əkrəm Əylislinin ölkədən çıxışına qadağa qoyulub. Xəbəri “Turan” agentliyi yayıb.
Xəbərdə deyilir ki, Əkrəm Əylisli Venesiyada keçirilən “Incroci Di Civilta” beynəlxalq ədəbiyyat festivalında iştirak etmək üçün martın 30-u təyyarə ilə Azərbaycandan çıxmaq istəyib. Bu məqsədlə o, martın 30-u səhər Bakının beynəlxalq hava limanına gedib. Ancaq sərhədçilər onun ölkədən çıxışına qadağa qoyulduğunu bildiriblər və Əkrəm Əylislini, həmçinin onun böyük oğlu İlyası saxlayıblar.
Həyat yoldaşı Qalina Əylislinin “Turan”a bildirdiyinə görə, yazıçıya ölkədən çıxışına qadağa qoyulduğu deyilsə də, bunun nə ilə bağlı olduğu izah olunmayıb.
Qalina Əylislinin dediyinə görə, Əkrəm Əylisli və oğlu hazırda Nəqliyyatda Baş Polis İdarəsinin aeroportdakı bölməsində saxlanılır. Səhər saat 9-dan bölmədə olan yazıçı və oğlu hələ də oradan buraxılmayıblar.
Daxili İşlər Nazirliyi mətbuat xidmətinin şöbə rəisi Orxan Mansurzadə Modern.az saytına açıqlamasında yazıçı Əkrəm Əylislinin saxlanması faktını təsdiqləyib. O deyib ki, hazırda araşdırma aparılır: “Nəticə bəlli olduqdan sonra ictimaiyyətə məlumat veriləcək”.
