Dövlət komitəsinin sabiq aparat rəhbərinə cinayət işi qaldırılıb
Ailə, Qadın və Uşaq Problemləri üzrə Dövlət Komitəsinin sabiq aparat rəhbəri Səfər İmanova qarşı cinayət işi başlanıb.
Baş Prokurorluğun mətbuat xidmətinin yaydığı məlumata görə, Səfər İmanovun vətəndaş Eynur Kərimovu işə düzəltmək adı ilə ondan külli miqdarda pul alıb aldatması ilə əlaqədar Ailə, Qadın və Uşaq Problemləri üzrə Dövlət Komitəsindən prokurorluğa müraciət daxil olub. Müraciət Baş Prokuror yanında Korrupsiyaya Qarşı Mübarizə Baş İdarəsində araşdırılıb.
Araşdırma zamanı Səfər İmanovun 2012-ci ildə vəzifə səlahiyyətlərindən sui-istifadə edərək Eynur Kərimovu məsul vəzifəyə təyin etdirəcəyi vədi ilə aldadaraq 170 min ABŞ dolları məbləğində pulunu ələ keçirməsində şübhələr üçün əsaslar olduğu müəyyənləşib. Fakta görə Cinayət Məcəlləsinin178.3.2-ci (dələduzluq, külli miqdarda ziyan vurmaqla törədildikdə) və 308.2-ci (vəzifə səlahiyyətlərindən sui-istifadə) maddələri ilə cinayət işi başlanıb.
Baş Prokurorluğun mətbuat xidməti bildirir ki, hazırda iş üzrə zəruri istintaq-əməliyyat tədbirləri davam etdirilir.
