Belçikanın 386 vətəndaşı İŞİD sırasında vuruşub
Belçikanın 386 vətəndaşı Suriyadakı silahlı toqquşmalarda İŞİD terror qruplaşmasının tərəfində vuruşub. Novator.az xəbər verir ki, bunu martın 30-da Belçikanın Daxili İşlər Nazirliyi açıqlayıb.
Nazirlik bəyan edib ki, ölkənin daha 59 vətəndaşı Suriyaya getməyə cəhd göstərib, amma gedə bilməyib.
Bu il martın 22-də Belçikanın paytaxtı Brüsseldə terror aktları törədilib. Nəticədə 30-dan çox adam həlak olub, onlarla adam yaralanıb. Partlayışları İŞİD terror qruplaşması öz üzərinə götürüb.
Suriyada 5 ildir vətəndaş müharibəsi davam edir. Suriya Siyasi Tədqiqatlar Mərkəzinin hesabatına görə, bu müddətdə qanlı toqquşmalarda 470 min suriyalı ölüb, 1 milyon 900 min adam yaralanıb. Əhalinin 45%-i qaçqına çevrilib, onlardan 4 milyon nəfəri vətəni tərk edib. Vətəndaş müharibəsinin başlandığı 2011-ci ilin martından bəri Suriyada orta ömür 70 yaşdan 55 yaşa düşüb.
