“Azadlıq” radiosunun baş redaktoru: “Xədicə də onların arasında olmalı idi”
“Azadlıq” radiosunun baş redaktoru Nenad Pejic Azərbaycan prezidenti İlham Əliyevin martın 17-də imzaladığı əfv sərəncamına jurnalist Xədicə İsmayılın adının salınmamasından məyusluğunu ifadə edib.
Radionun yaydığı məlumata görə, Nenad Pejic deyib: “Biz ifadə və sərbəst toplaşma azadlığı kimi təməl hüquqlarından istifadə etdiklərinə görə məhkum olunandan sonra azadlığa buraxılmış jurnalistlərə, insan haqları müdafiəçilərinə və fəallara görə hədsiz sevinc hissi keçiririk, lakin Xədicə də onların arasında olmalı idi”.
Xədicə İsmayıl 2014-cü il dekabrın 5-dən həbsdədir. Bakı Ağır Cinayətlər Məhkəməsi 2015-ci il sentyabrın 1-də ona 7 il 6 ay azadlıqdan məhrumetmə cəzası kəsib. Bundan başqa o, 3 il müddətinə vəzifə tutmaq hüququndan məhrum edilib.
Məhbus jurnalist hazırda 4 saylı Cəzaçəkmə Müəssisəsində saxlanır.
1976-cı ildə Bakıda anadan olan Xədicə İsmayıl 1997-ci ildə Bakı Dövlət Universitetini bitirib. Jurnalist fəaliyyətinə “Günaydın” qəzetində başlayıb, bir sıra KİV-lərdə, o cümlədən “Zerkalo”, “Exo” qəzetlərində, “Amerikanın səsi” radiosunda çalışıb. 2008-ci ildən “Azadlıq” radiosunda işləyib. 2008-2010-ci illərdə radionun Bakı bürosuna rəhbərlik edib.
