Almaniya: polislərin paltarına videokamera bərkidiləcək
Almaniyada polisə yığcam videokameradan (Bodycam) istifadə etməyə icazə veriləcək. Novator.az xəbər verir ki, videokamera polis əməkdaşlarının uniformasına bərkidiləcək. Almaniyanın hakim partiyalar bloku (Xristian-Demokrat Birliyi ilə Xristian-Sosial Birliyinin yaratdığı blok) və Sosial-Demokrat Partiyası bu məsələdə razılığa gəlib.
Almaniya Bundestaqının deputatları hesab edirlər ki, belə kameralar müdafiə məqsədi daşıyır, polisə qarşı hücumların araşdırılmasında və digər münaqişəli vəziyyətlərdə gərginliyin aradan qaldırılmasında yardımçı ola bilər.
2015-ci ildə Almaniyanın iki böyük vilayətində hakimiyyət orqanları polisin videokameralardan istifadə etməsinə qərar vermişdi. Yeni qurğunun tətbiqi həmin bölgələrdə polisə hücumun azalmasına gətirib çıxarıb və buna görə də yeniliyin bütün ölkədə tətbiqinə impuls verib.
