Putini Avropaya buraxmamaq təklif olunur
Avropa Parlamentinin 57 deputatı Rusiya prezidenti Vladimir Putinə sanksiyalar tətbiq etməyə çağırıb. Transparency.az-ın məlumatına görə, Avropa İttifaqının xarici işlər və təhlükəsizlik siyasəti üzrə ali təmsilçisi Federika Mogeriniyə ünvanlanan çağırışda Rusiya prezidentinə və daha 28 məsul şəxsə viza qadağası tətbiq etmək, onların bank hesablarını dondurmaq və əmlaklarına həbs qoymaq təklif olunur.
Sanksiya təklifi Ukrayna vətəndaşı Nadejda Savçenkonun işi ilə bağlıdır. Rusiyanın hüquq mühafizə orqanları Nadejda Savçenkonu həbs edib. O, rusiyalı jurnalistlər İqor Kornelyuk və Anton Voloşinin Ukrayna ərazisində öldürülməsində iştirakda ittiham olunur. İqor Kornelyuk və Anton Voloşin 2014-cü ilin yayında Ukrayna ordusunun mina atəşi ilə ölüblər. İstintaq iddia edir ki, Luqansk vilayətində rusiyalı jurnalistlərin koordinatını Silahlı Qüvvələrə o zaman Ukrayna ordusunun sərəncamında olan Nadejda Savçenko verib. Nadejda Savçenko Rusiyanın Rostov vilayətində mühakimə olunur. Prokuror ona 23 il iş istəyib.
Avropa Parlamentinin deputatları Federika Mogeriniyə ünvanlanan çağırışda Nadejda Savçenkonun qanunsuz tutularaq Rusiyaya aparıldığını, saxta ittihamlarla məhkəmə qarşısına çıxarıldığını bildirir. Onlar Rusiya prezidenti Vladimir Putinin, Federal Təhlükəsizlik Xidmətinin başçısı Aleksandr Bortnikovun, Rusiya İstintaq Komitəsinin rəhbəri Aleksandr Bastrıkinin, Luqansk separatçılarının lideri İqor Plotnitskinin, bəzi müstəntiqlərin, hakimlərin və başqa şəxslərin Avropa İttifaqının 28 ölkəsinə səfərlərini qadağan etmək, onların bank hesablarının və əmlaklarının üzərinə həbs qoymaq təklifi irəli sürür.
2014-cü ilin fevral ayında Ukraynada hakimiyyət xalq üsyanı ilə dəyişib, Rusiyaya yaxın qüvvələri Qərb meylli qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib və Donbasda iki separatçı rejimin əli ilə bu bölgənin bir hissəsini işğal edib.
