Xədicə İsmayılla görüşə icazə verilməyib
Martın 7-də Sivil Toplum Platformasının bir qrup üzvü jurnalist Xədicə İsmayılın cəza çəkdiyi 4 saylı Cəzaçəkmə Müəssisəsinə gediblər.
Lakin görüşə icazə verilməyib və nəticədə 8 Mart Beynəlxalq Qadınlar Günü münasibətilə hədiyyəni Xədicə İsmayıla çatdırmaq mümkün olmayıb.
Həbsxana işçiləri bunu martın 7-nin qəbul günü olmaması ilə əsaslandırıblar.
Sivil Toplum Platformasının üzvləri etiraz bildirsələr və həbsxana məmurları ilə saat yarımadək danışıqlar aparsalar da, proses nəticəsiz qalıb.
Xədicə İsmayıl 2014-cü il dekabrın 5-dən həbsdədir. Bakı Ağır Cinayətlər Məhkəməsi 2015-ci il sentyabrın 1-də ona 7 il 6 ay azadlıqdan məhrumetmə cəzası kəsib. Bundan başqa o, 3 il müddətinə vəzifə tutmaq hüququndan məhrum edilib. Məhkəmə Xədicə İsmayılı qanunsuz sahibkarlıq, vergidən yayınma, vəzifədən sui-istifadədə təqsirli bilib. Jurnalistin özü və müdafiəçiləri ittihamları qəbul etmir və həbsin siyasi sifarişə söykəndiyini, X.İsmayılın apardığı jurnalist araşdırmaları ilə bağlı olduğunu bildirir.
1976-cı ildə Bakıda anadan olan Xədicə İsmayıl 1997-ci ildə Bakı Dövlət Universitetini bitirib. Jurnalist fəaliyyətinə “Günaydın” qəzetində başlayıb, bir sıra KİV-lərdə, o cümlədən “Zerkalo”, “Exo” qəzetlərində, “Amerikanın səsi” radiosunda çalışıb. 2008-ci ildən “Azadlıq” radiosunda işləyir. 2008-2010-ci illərdə radionun Bakı bürosuna rəhbərlik edib.
Sivil Toplum Platformasını 2016-cı il fevralın 10-da bir qrup vətəndaş cəmiyyəti nümayəndəsi, vəkil və jurnalistlər yaradıb. Platforma problemləri diskussiya masasına çıxarmaq, ətraflı müzakirələr keçirmək və konkret nəticələr əldə etmək məqsədilə təsis olunub.
