Taleh Bağırovun həbs müddəti uzadılıb
Martın 7-də Nəsimi Rayon Məhkəməsində baş prokurorun birinci müavini Rüstəm Usubovun “Müsəlman birliyi” hərəkatının sədri, həbsdə olan ilahiyyatçı Taleh Bağırov ilə bağlı təqdimatına baxılıb. Təqdimat əsasında ilahiyyatçı barəsində seçilmiş həbs qətimkan tədbirinin müddəti 3 ay – iyunun 26-dək uzadılıb.
Ötən il noyabrın 26-da Taleh Bağırov barəsində 4 aylıq həbs qətimkan tədbiri seçilmişdi.
İlahiyyatçının vəkili Cavad Cavadov “Azadlıq” radiosuna deyib ki, qapalı keçirilən məhkəmə prosesində Taleh Bağırov özü də iştirak edib. Taleh Bağırov çıxış edib və qanunsuz həbs olunduğunu bildirib. İlahiyyatçı ona qarşı irəli sürülən ittihamların əsassız olduğunu vurğulayıb.
Vəkilin sözlərinə görə, həbs müddətinin uzadılmasına dair qərardan apellyasiya şikayəti veriləcək.
2015-ci il noyabrın 26-da Daxili İşlər Nazirliyinin Bakının Nardaran qəsəbəsində keçirdiyi əməliyyatda iki polis əməkdaşı və bir neçə mülki şəxs həlak olub. Əməliyyatda və daha sonra “Müsəlman birliyi” hərəkatının rəhbəri Taleh Bağırov və xeyli başqa şəxs tutulub. Baş Prokurorluq bəyan edib ki, “Müsəlman birliyi” hərəkatı dövlətin konstitusiya quruluşunu zorla dəyişdirmək, şəriət qanunları ilə idarə edilən dini dövlət qurmaq məqsədilə yaradılıb, silahlanıb və hakimiyyət nümayəndələrinə qarşı terror aktları törətməyi də planlaşdırıb.
