Hansı sanksiyalar ləğv olunub?
Fevralın 16-dan Avropa İttifaqının Belarus prezidenti Aleksandr Lukaşenko və daha 169 dövlət məmuruna sanksiyaları qüvvədən düşüb. Qərarı fevralın 15-də Avropa İttifaqı Şurası çıxarıb.
Bir neçə ildir tətbiq olunan sanksiyalar Belarusda demokratiyanın boğulmasına görə məsuliyyət daşıyan hakimiyyət mənsublarının Avropa İttifaqının 28 ölkəsinə girişinə qadağanı, həmin şəxslərin Avropa İttifaqı zonasındakı hesablarının dondurulmasını nəzərdə tuturdu.
Ötən ilin oktyabrında 170 nəfərə qarşı sanksiyalar dörd aylığa dayandırılmış, qərar ölkənin 3 hüquqi şəxsinə də şamil olunmuşdu. Bu, Belarusda bütün siyasi məhbusların əfvi ilə əlaqələndirilmişdi.
Novator.az xəbər verir ki, Avropa İttifaqı Belarus üzərindəki silah embarqosunu və 4 məmur barədə sanksiyaları qüvvədə saxlayıb. Qərb bir vaxtlar güc nazirləri işləmiş bu rəsmiləri 1999-2000-ci illərdə Aleksandr Lukaşenkonun siyasi opponentlərinin yoxa çıxmasında ittiham edir. Bu iki bölüm üzrə sanksiyalar 12 ay müddətinə uzadılır.
“Azadlıq” radiosunun arayışına əsasən, Avropa İttifaqı Belarus üzərinə ilk sanksiyaları insan haqları və demokratik prosedurların pozulmasına görə 1998-ci ildə qoyub. 2006-cı ildə Birləşmiş Ştatların Belarusa sanksiyaları tətbiq olunub. Avropa İttifaqı 2008-ci ildə sanksiyaları ləğv etsə də, onları 2011-ci ildə təkrar qüvvəyə mindirmişdi. Bu, 2010-cu ildə keçirilmiş prezident seçkisindən və etiraz aksiyaları iştirakçılarının həbslərindən sonra baş vermişdi.
Aleksandr Lukaşenko 1994-cü ildən prezident kürsüsünü tutur. Sonuncu dəfə ötən ilin sonunda 5 il müddətinə dövlət başçısı seçilib. Son vaxtlar Avropada ona münasibət nisbətən yumşalıb.
