Suriya dəhşətləri: 470 min adam ölüb, orta ömür 55 yaşa düşüb
Suriya Siyasi Tədqiqatlar Mərkəzi ölkədə 5 ildir davam edən vətəndaş müharibəsi ilə bağlı hesabat açıqlayıb. Novator.az xəbər verir ki, mərkəzin ekspertləri vətəndaş müharibəsində 470 min suriyalının öldüyünü bəyan ediblər.
Hesablamalara görə, 5 ildə 1 milyon 900 min adam yaralanıb.
Həlak olanların 400 min nəfərinin bilavasitə hərbi əməliyyatlarda öldüyü bildirilir. 70 min adam isə müharibənin gətirdiyi digər bəlalara – aclığa, susuzluğa, xəstəliyə, soyuğa qurban gedib.
Hesabata əsasən, ölənlərin və yaralananların ümumi sayı Suriyanın müharibəyə qədərki əhalisinin (21 milyon nəfər) 11,5%-dir.
Mütəxəssislər vətəndaş müharibəsində ölkəyə 255 milyard dollardan çox ziyan dəydiyini bildirirlər. Bu müddətdə 14 milyon nəfərə yaxın suriyalı gəlir mənbəyini itirib. Əhalinin 45%-i qaçqına çevrilib, onların 4 milyonu vətəni tərk edib.
Hesabatda qeyd olunur ki, vətəndaş müharibəsinin başladığı 2011-ci ilin martından bəri Suriyada orta ömür 70 yaşdan 55 yaşa düşüb.
