Nazirlik: “Bütün filmlər qeydiyyatdan keçirilməlidir”
Fevralın 12-də Mədəniyyət və Turizm Nazirliyi İnzibati Xətalar Məcəlləsinə dəyişikliklə bağlı bildiriş yayıb.
Novator.az-ın məlumatına görə, nazirliyin bildirişində deylilir: “Mülkiyyət formasından, buraxılış vaxtından və yerindən, texnikasından və istehsal üsullarından asılı olmayaraq milli, xarici və ya müştərək bədii, xronikal, sənədli, elmi-kütləvi, təhsil, cizgi və başqa janrlarda çəkilmiş filmlərin qanunsuz nümayişi, pornoqrafiya və zorakılıq təbliğ edən filmlərin yayımının qarşısının alınması, tamaşaçı auditoriyasının yaş kateqoriyalarının müəyyənləşdirilməsi məqsədilə Azərbaycan Respublikasının ərazisində yayımına və kütləvi nümayişinə icazə verilən bütün filmlər Mədəniyyət və Turizm Nazirliyində qeydə alınmalı və filmlərin dövlət reyestrinə daxil edilməlidir.
İnzibati Xətalar Məcəlləsinin 223-11-ci maddəsinə əsasən, kino və videofilmlərin Filmlərin Dövlət Reyestrində qeydiyyata alınmadan ölkə ərazisində yayımına və kütləvi nümayiş etdirilməsinə görə 2000 manat miqdarında cərimə tətbiq edilir”.
Mədəniyyət və Turizm Nazirliyi ölkədə film yaymaq və kütləvi nümayişini həyata keçirmək istəyənlərə həmin filmləri nazirlikdə qeydiyyatdan keçirməyi və dövlət reyestrinə daxil etməyi tövsiyə edib.
