Sivil Toplum Platforması yaradılıb
Fevralın 10-da bir qrup vətəndaş cəmiyyəti nümayəndəsi, vəkil və jurnalist Sivil Toplum Platforması yaratdıqlarını bəyan edib. Açıqlamaya görə, platforma problemləri diskussiya masasına çıxarmaq, ətraflı müzakirələr keçirmək və konkret nəticələr əldə etmək məqsədilə yaradılıb.
Novator.az xəbər verir ki, Sivil Toplum Platformasının üzvləri qurumun əsasnaməsini qəbul edib və ictimaiyyətə müraciət ünvanlayıblar.
Müraciəti Abil Bayramov, Akif Qurbanov, Aynur İmranova, Azər Mehtiyev, Bəşir Süleymanlı, Ələsgər Məmmədli, Əsabəli Mustafayev, Əvəz Zeynallı, Fuad Həsənov, Xalid Ağaliyev, Xalid Bağırov, Kamran Mahmudov, Mehman Əliyev, Mehriban Rəhimli, Nəsimi Məmmədli, Oqtay Gülalıyev, Rövşən Ağayev, Rövşən Hacıbəyli, Ruslan İzzətli, Samir Əliyev, Samir Kazımlı, Seymur Kazımov, Şahvələd Çobanoğlu, Şəhla İsmayıl, Yalçın İmanov və Ziya Quliyev imzalayıblar.
Ələsgər Məmmədli və Akif Qurbanov platformanın sözçüləri təyin edilib.
Müraciətdə deyilir ki, Azərbaycan cəmiyyətinin qarşısında duran əsas çağırış ölkəni üzləşdiyi iqtisadi, sosial və siyasi böhrandan çıxarmaq, son illər sürətlə məhdudlaşdırılan hüquq və azadlıqların bərpasına və qorunmasına nail olmaqdır: “Hazırkı böhran ölkəni və cəmiyyətin bütün təbəqələrini əhatə edir. Milli valyutanın dəyər itirməsi, bahalaşma, yüksək inflyasiya, iş yerlərinin itirilməsi, vətəndaşların həyat səviyyəsinin pisləşməsi, işgüzar fəallığın azalması, hüquq və azadlıqların hər addımda pozulması, məhkəmə sistemindəki ədalətsizliklər, vətəndaşların səsinin eşidilməməsi – həllini gözləyən problemlərin tam olmayan siyahısıdır. Təəssüf ki, problemlərin həllinə yönələn ciddi cəhdlər yoxdur və pafosla atılan sönük addımlar ümidverici nəticələrə səbəb olmayıb, imitasiya xarakterlidir”.
Müraciət müəllifləri bildirirlər ki, belə bir şəraitdə onlar problemlərin həlli istiqamətində səyləri birləşdirmək, ideyaları hamı ilə bölüşmək qərarına gəliblər: “Ölkəmizin üzləşdiyi bütün problemlərdən çıxış yollarının tapılmasında iştirak etməyə, çətin və məsuliyyətli bir tarixi dövrdə vətəndaşların səsini duyurmağa hazır olduğumuzu nümayiş etdiririk.
Sivil Toplum Platforması olaraq əminik ki, ölkənin qarşısında duran bütün problemlərdən birgə təşəbbüs və tələblərimiz sayəsində sağlam və daha az itki ilə çıxmaq mümkün olacaq. Hədəfimiz azad, ədalətli və demokratik Azərbaycandır!”
