Cəbhəçi fəala şərti həbs verilib
AXCP-nin Şərur rayon şöbəsinin həbsdə olan fəalı Nazim Mahmudovun məhkəməsi başa çatıb. AXCP Naxçıvan təşkilatının sədri Yaşar Bağırsoy “Azadlıq” qəzetinə bildirib ki, cəbhəçi fəal Cinayət Məcəlləsinin 315.1-ci (hakimiyyət nümayəndəsinə müqavimət göstərmə) maddəsi ilə 1 il 6 ay müddətinə azadlıqdan məhrum edilib.
Lakin ona münasibətdə Cinayət Məcəlləsinin 70-ci maddəsi də tətbiq olunub və nəticədə Nazim Mahmudova verilən həbs cəzası şərti hesab olunub. Ötən il noyabrın 15-dən həbsdə olan cəbhəçi hökm elan ediləndən sonra məhkəmə zalından azadlığa buraxılıb.
Müdafiəçiləri bildirirlər ki, Nazim Mahmudov Sədərək gömrük-keçid məntəqəsində ondan rüşvət tələb olunduğuna görə məmurlardan biri ilə mübahisə edib və bundan sonra tutulub. Onun həbsindən sonra anası mətbuata demişdi ki, həmin hadisədən sonra polislər Nazim Mahmudovun evinə gələrək onu həbs ediblər.
