Aclıq etdiyi deyilən cəbhəçi ilə görüşə icazə verilmir
Binəqədi rayonundakı müvəqqəti saxlanma təcridxanasında Azərbaycan Xalq Cəbhəsi Partiyasının fəalı Füzuli Hüseynovun aclıq aksiyasını davam etdirdiyi bildirilir. Bu haqda “Azadlıq” radiosuna AXCP funksioneri Ramiz Kamal danışıb.
Fevralın 8-də təcridxanaya gedən R.Kamala görüş verməyiblər: “Polislər mənə bildirdilər ki, Füzuli Hüseynov aclığı davam etdirir, görüş verə bilmərik, ancaq yaxınları görüşə bilərlər”. R.Kamalın sözlərinə görə, polislər onun F.Hüseynova apardığı qidanı qəbul etməkdən də imtina ediblər.
P.Kamal bildirib ki, belə davam edərsə F.Hüseynovun səhhətində ciddi problemlərin yarana biləcəyini polislərin nəzərinə çatdırıb: “Polislər də mənə dedilər ki, bbiz işimizi ehtiyatlı tutmuşuq, qida qəbul etmədiyini aktlaşdırmışıq”.
R.Kamal fevralın 5-də də təcridxanaya qida apardığını, amma yenə də qəbul olunmadığını söyləyib.
Buna qədər AXCP sədrinin müavini Nurəddin Məmmədli də F.Hüseynovla görüşmək üçün təcridxanaya getmiş, amma görüşə imkan verilməmişdi.
Abşeron Rayon Məhkəməsi polisə müqavimət ittihamı ilə AXCP Xətai rayon təşkilatının fəalı Füzuli Hüseynova yanvarın 27-də 30 sutka inzibati həbs cəzası verib. Partiyadaşlarının dediyinə görə, F.Hüseynov həbs barədə qərarı əsassız sayaraq aclıq aksiya keçirir. N.Məmmədli F.Hüseynovun inzibati həbsinə səbəb kimi sosial şəbəkələrdəki fəaliyyətini göstərib.
Penitensiar Xidmətin ictimaiyyətlə əlaqələr şöbəsindən isə bu deyilənlərə hələ ki, münasibət öyrənmək mümkün olmayıb.
