AXCP fəalına 8 il həbs verilib
Xalq Cəbhəsi Partiyasının Babək rayon şöbəsinin fəalı Zeynalabdin Bağırzadə 8 il müddətinə azadlıqdan məhrum edilib. Qərar fevralın 2-də çıxarılıb.
Z.Bağırzadə 2012-ci ildə 7 il yarım şərti cəza almışdı. Həmin vaxt məhkəmə onu Çernobıl qəzası ilə bağlı əlliliyi saxta almaqda, səlahiyyət həddini aşmaqda, sənədləri saxtalaşdırmaqda təqsirli bilmişdi.
2015-ci ilin noyabrında Z.Bağırzadə saxlanılıb və ayın 16-da Babək Rayon Məhkəməsi onun barəsində istintaq müddətinə həbs qətimkan tədbiri seçib. Bu dəfə Z.Bağırzadə Babək rayon sosial təminat işçilərinə zor tətbiq etmədə ittiham olunub. Yaxınları isə bildirirlər ki, əslində sosial müdafiə işçiləri zorakılıq ediblər. Z.Bağırzadənin qardaşı, AXCP Naxçıvan təşkilatının rəhbəri Yaşar Bağırsoy “Azadlıq” radiosuna deyib ki, o vaxt Z.Bağırzadənin evinə gələn Sosial Müdafiə Fondunun əməkdaşları onun xanımına qarşı təhqiramiz ifadələr işlədiblər. Z.Bağırzadə bununla bağlı fonda gedərək həmin adamları tapıb, həyətindəki hadisəyə görə etirazını bildirib. Daha sonra o, hadisə ilə bağlı prokurorluğa şikayət ərizəsi verib. Amma iş Z.Bağırzadənin özünün əleyhinə çevrilib, ona cinayət işi açılıb. Sonda məhkəmə əvvəlki 7 il yarım şərti cəzanın çəkilməmiş hissəsini indiki cəzanın üstünə gəlməklə Z.Bağırzadəni 8 il müddətinə azadlıqdan məhrum edib.
Yaşar Bağırsoy vurğulayıb ki, bu, siyasi qərardır: “Qardaşımın həbsinə səbəb mənim AXCP Naxçıvan təşkilatının rəhbəri olmağımdır”.
AXCP rəhbərliyi də Z.Bağırzadənin həbsini siyasi motivli sayır.
