Fuad Qəhrəmanlının şikayəti təmin olunmadı
Bakı Apellyasiya Məhkəməsində Azərbaycan Xalq Cəbhəsi Partiyası sədrinin müavini Fuad Qəhrəmanlının şikayətinə baxılıb. Şikayət Fuad Qəhrəmanlı haqda seçilmiş həbs qətimkan tədbirinin ev dustaqlığı ilə əvəzlənməsi barədə vəsatət təmin edilmədiyinə görə verilmişdi. Həmin vəsatəti Nəsimi Rayon Məhkəməsi təmin etməmişdi.
Fevralın 1-də Bakı Apellyasiya Məhkəməsi şikayəti təmin etməyib. Apellyasiya prosesində F.Qəhrəmanlının özü də iştirak edib. Vəkil Nemət Kərimli prosesdən sonra Azadliq.info-ya bildirib ki, Nəsimi məhkəməsinin qərarı qüvvədə saxlanıb.
F.Qəhrəmanlı 2015-ci il dekabrın 8-də tutulub. O, Cinayət Məcəlləsinin 281.1 (dövlət əleyhinə yönələn açıq çağırışlar) və 283.2.1-ci (milli, irqi, sosial və ya dini nifrət və düşmənçiliyin salınması zor tətbiq etmə hədəsi ilə törədildikdə) maddələri ilə təqsirləndirilir. Nəsimi Rayon Məhkəməsi onun barəsində üç aylıq həbs qətimkan tədbiri seçib. F.Qəhrəmanlı özü və müdafiəçiləri ittihamları qəbul etmir, bunu siyasi sifariş adlandırırlar.
Fuad Qəhrəmanlı 1975-ci ildə Şahbuz rayonunda doğulub. Dövlət İdarəçilik Akademiyasını politoloq ixtisası üzrə bitirib. 1990-cı ildən Azərbaycan Xalq Cəbhəsinin üzvüdür. 1994-1997-ci illərdə “Avrasiya”, “Azadlıq”, “Yeni Müsavat” qəzetlərində çalışıb. 1998-ci ildə “Müxalifətin mitinq taktikası” adlı çap olunmamış məqaləyə görə xüsusilə ağır dövləti cinayətdə ittiham olunaraq 1 il 6 ay müddətinə azadlıqdan məhrum edilib. 1 il 2 aylıq həbsdən sonra azadlığa buraxılıb. 2000-ci ildə AXCP Analitik Mərkəzinin rəhbəri təyin edilib. Həmin il partiya Ali Məclisinin üzvü seçilib. 2003-cü ildən AXCP Ali Məclisi Rəyasət Heyətinin üzvü, 2009-cu ildən AXCP sədrinin müavinidir.
Fuad Qəhrəmanlı 2011-ci ildə müxalif İctimai Palatanın razılaşdırılmamış 2 aprel mitinqinə görə 2 il müddətinə şərti azadlıqdan məhrum edilib.
