Fuad Qəhrəmanlı ilə bağlı apellyasiya şikayəti verilib
Azərbaycan Xalq Cəbhəsi Partiyasının sədr müavini Fuad Qəhrəmanlı barəsində Nəsimi Rayon Məhkəməsinin çıxardığı həbs qərarının dəyişdirilməsi ilə bağlı apellyasiya şikayəti verilib. Bunu Trend-ə F.Qəhrəmanlının vəkili Nemət Kərimov deyib.
Vəkil bildirib ki, şikayət həbs qərarının ev dustaqlığı ilə əvəz edilməsi barədədir: “Biz Nəsimi Rayon Məhkəməsinə müraciət etmişdik ki, Fuad Qəhrəmanlı barəsində seçilmiş həbs qətimkan tədbiri istintaq müddətində ev dustaqlığı ilə əvəz edilsin. Səbəb kimi isə Fuad Qəhrəmanlının səhhətində problemlərin olmasını göstərmişdik. Fuad şəkər xəstəliyindən əziyyət çəkir. Ona görə də onun istintaq müddətində ev şəraitində müalicəsini istəmişdik. Məhkəmə müraciəti təmin etmədi. İndi həmin qərardan Bakı Apellyasiya Məhkəməsinə şikayət etmişik”.
